AMBO ditalepon jo si Lelek nan punyo blog www.eriandi.wordpress.com nan tasabuik Lelek Ganteng tu mah, pukua 12 hari Minggu tanggal 30 Desember 2008 tu. Antah manga paja tu, ambo kiro ka maagiah pacah inyo. Ee ruponyo maajak makan siang di Lubuak Idai Jln. Khatib Sulaiman tu.
Dek angek hari katiko tu, maleh pulo ambo baonda-onda kasinan. Tapi, nyo telpon sakali lai jo si Lelek, keceknyo ado patamuan para blogger. Dek ada blogger ko, iyolah tatarik bana ambo hadir di patamuan tu. Indak inyo katinggalan, tapaso ambo pacu onda di ateh 80 km/jam. Bayanganselah, bara kancangnyo tu.
Iyo bajadi patamuan tu mah. Walau hanyo dihadiri anam baleh urang, tapi lah bisa saiyo sakato katiko tu untuk mambantuak komunitas blogger urang Padang. Lah dirumuskanlah apa namo komunitas tu.
Tantu nan patamo maagiah usulan ambo lah urangnya. Kecek ambo ka forum, namo komunitas tu Komunitas Blogger Urang Padang se. Bia lah panjang, tapi kan namo tu netral, indak ado embel-embel. Indak ado surangpun nan satuju dek namo tu, iyo ibo bana hati ambo. Dari sambilan usulan namo, namo palanta nan diusulkan si Lelek nan ditarimo. Agaknya paja ko sabalumnyo lah manjampi-jampi agar usulannya ditarimo. Maklum, si Lelek ko takenal juo jo panggilan Ombak Puruih. Tau se lah urang urang Puruih, banyak kasiak di sinan.
Lah tabuek namo, si Max nan dari tadi mamimpin diskusi membukak loh sesi pamilihan katua. Dek lah kanyang jo lamaknyo lauk panggang Lubuk Idai, kasadoalahe katuju se si Max jadi katua. Basaamoan jo itu dibantuak pulo seksi-seksi nan diisi jo gadiah-gadiah seksi nan hadir katiko tu.
Walaupun tasabuik sabagai komunitas blogger urang Padang, nan di komunitas ko indak malulu isinyo urang Minang atau nan lai di Padang. Namonyo Kota Padang ko kini lah baragam urangnyo, sia se nan badomisili dan mambuek blog di kota ko lah manjadi bagian dari komunitas ko. Bia lah urang awak, urang Jawa, Cino atau kok adoloh urang Eskimo di siko, ditarimo kasadoalahe. Latar aktifitas urangnya yo beda-beda loh, ado wartawan, daka di Lelek jo si Max, ado dosen, mahasiswa ado loh nan mangaku pangangguran. Yang pantiang lai punyo blog e.
Lah banyak lo agenda jo program nan disusun katiko tu. Dek baru, tantu sadang dirumuihkanlu. Yang jaleh, iko kaba salayang pandang lu, bisuk-bisuk tu ado nan baru lai. A.R. Rizal
Tidak ada komentar:
Posting Komentar